စီးပွားရီ၊ နိုင်ငံရီး၊ ပထဝီအရ ရောထွီးနိယာဖြိုက်တေ။
ရခိုင်လူမှုအဖွေ့အစေးရေ ဒေအချိန်ကာလမာ အပျော့စားအချိန်ကိုရောက်နီရေ။ အမျိုးသားတော်လှန်ရီးလမ်းကြောင်းလေ့ ရောထွီးနီယာဖြိုက်တေ။ ဒေပိုင်အခြေအနေမျိုးမာ ဝံသာနုလုပ်ရပ်ရေ စိစပ်သေချာနီဖို့လိုရေ။
ပြတ်သားဖို့လို့ရေ။
ယင်းခေတ်၊ ယင်းအခါက ရခိုင့်လှုပ်ရှားမှုကိုကြည့်လိုက်ကေ ရခိုင်ရာဇဝင်ကို ဗမာစာပီမာပြုလုပ်ခြင်း၊ ရခိုင်အကြောင်းကို အင်္ဂလိပ်စာပီမှာဖော်ထုတ်ခြင်း၊ ရခိုင်ရှိးဟောင်းစာပီကို ဗမာစာပီလောကမာဖော်ထုတ်ခြင်း လုပ်နီခကတ်စွာကိုတွီ့ရရေ။ ရခိုင်မှုအရပ်ရပ်ကို ဖော်ထုတ်ရေအပိုင်းကို ယင်းပိုင်တွိ့ရပြီးနောက်ပိုင်မာ မြှင့်တင်ရေအပိုင်းကိုမတွိ့ရရေ။
လှုပ်ရှားရေ အပိုင်းကိုမတွိ့ရ၊ ရခိုင်နိုင်ငံကို ကိုယ်နိုင်ငံ၊ ရခိုင်အမျိုးသားရေ ကိုယ့်အမျိုးသား၊ ရခိုင်ယဉ်ကျေးမှုရေ ကိုယ်ယိုဉ်ကျေးမှု၊ ရခိုင်စာပီရေ ကိုယ့်စာပီလို့ ကြွေးကြော်ခစွာကိုမတွိ့ရ။
ယင်းခေတ်ကပညာသျှင်ရို့ လုပ်ဆောင်ကြိုး ပမ်းခကတ်စွာရေ အမှန်ပင်အကျိုးဟိပါရေ။
ယကေလေ့ အမျိုးသားဘောင်ကို ပြတ်ပြတ်သားသား မလုပ်ခကတ် တေအတွက်စွာရေ အမှန်ပင်အကျိုးဟိပါရေ။
ယကေလေ့ အမျိုးသားဘောင်ကို ပြတ်ပြတ်သားသားမလုပ်ခကတ်တေအတွက်နန့် ရခိုင်ဘောင်နန့် ဗမာဘောင် ရောထွီးလားခကတ်တေ။
ရောထွီးလားစွာမှာတောင် တန်းတူးရွယ်တူ ရောထွီးလားစွာမဟုတ်ဘဲ၊ တဆင့်ခံလက်အောက်ခံအနီနန့်ရာ ရောထွီးလားခကတ်စွာဖြိုက်တေ။
ဝါးမျိုခံရစွာထက်ဆိုးသိရေ။
ယင်းနန့်ဇု အဂုငါ့ရို့ခေတ်မာ ရခိုင်မာ စာဟိယင့်လား၊ ရခိုင်မာ ဂီတဟိယင့်လား၊ ရခိုင်မာ တေးခြင်း ဟိဟင့်လား၊ ရခိုင်မာ အမျိုးသားဝတ်စုံဟိယင့်လား စရေ ရှက်ကောင်းထမ်း မေးခွန်းတိ ပေါ်လာရရေမဟုတ်လား။
ဇာလောက်ထိလေးဆိုပါကေ “ရခိုင်ရေ လူမျိုးတမျိုးသား” “ရခိုင်ပြေလား၊ ရခိုင်တိုင်လား” “ရခိုင်ရေဗမာပြေ၏ အစိပ်အပိုင်းတခုမဟုတ်လား” “ ရခိုင်ပြေရေ ကိုလိုနီတပိုင်းရာဖြိုက်တေ။
လုံးဝကိုလိုနီမဟုတ်” “ရခိုင် အမျိုးသားရီးလုပ်ကေ ကျိုင်းမြောင်းရေ။
ရခိုင်ယိုဉ်ကျေးမှုကို မြင့်တင့်ဖော်ထုတ် စွာရေ ခေတ်နောက်ပြန်ဆွဲရေ” စရေ မေးခွန်းတိ စကားတိ ပေါ်ပေါက်လာခရရေမဟုတ်လား၊ ဇာလောက်ထိရှက်ဖို့ကောင်းရေလေး။
ဒေရခိုင်ဝံသာနုခေတ်မှာ ထိရောက်တေပြေ့ဝမှု၊ ရင့်ကျင်မှု၊ ပြတ်သားမှုရှိ့မဟိခလို့ ရခိုင်ဘောင်နန့် ဗမာဘောင် ရောထွီးလားခရရေ၊ အမျိုးသားယှိဉ်ကျေးမှုဘောင်ပြတ်သားမှ အမျိုးသားတော်လှန်ရီး ဘောင်ပြတ်သားဖို့၊ ယေမှ ပြတ်သားရေ အမျိုးသားအောင်ပွေးကိုရဖို့။
အမျိုးသားရီးဘောင်ပြတ်သားမှ အမျိုးသားအောင်ပွေးကိုပြတ်သားဖို့။
အဂုပိုင် ဘောင်ရောထွီးစွာ၏ အကြောင်းတရားကို မျက်မှောက်ကလကပင် အတိတ်ကာလအထိ ပြန်လေသုံးသတ်ကြေကေ အောက်ပါအတိုင်းတွိ့ဟိရရေ။
(၁) ၂၀-ရာစု ပထမပိုင်း ရခိုင်နိုင်ငံရီးခေါင်းဆောင်စာပီယှိဉ်ကျေးမှုခေါင်းဆောင်ရို့ ရခိုင်အမျိုးသားတော်လှန်ရီးလမ်းကြောင်းကို ဂရုမစိုက်ခြင်း။
(၂) ၁၉-ရာစုကာလက ဗြိတိသျှအရင်းသျှင်နေချေ့ရို့ ရခိုင်စီးပွားရီး၊ နိုင်ငံရီး၊ ယဉ်ကျေးမှု၊ လူမှုရီးတိကို ရောထွီးပိုက်ခြင်း၊ ရခိုင်ပြေကို ခွဲစိပ်ချင်ပိုင် ခွဲစပ်လို့ ပေါင်းစပ်ချင်ပိုင် ပေါင်းစပ်က်ခြင်။
(၃) ၁၈-ရာစုကာလက ဗမာပဒေသရာဇ်နေချေ့ရို ရခိုင်အမျိုးသား လက္ခဏာအရပ်ကို ဖျက်ဆီးပိုက်ခြင်း တပြေလုံးကို ဆောက်တေရာမအောင် နှိပ်စက်သတ်ဖြတ်ခြင်း။
(၄) ၁၇-ရာစု ရခိုင်အမျိုးသားအချင်းချင်း ဒေသစွဲအရ၊ ဂိုဏ်းစွဲအရ ခွဲခြားခကတ်ခြင်း၊ အမျိုးသားစေးရုံးရီး ပြိုက်ကွဲပျက်စီးခြင်းရို့ဖြိုက်တေ။
ရပိုင်ပျက်ဆီးနီစွာ၏ သရုပ်ကို နေချဲ့အဆက်ဆက် ကိုင်တွယ်ဖျက် ဆီးခကေလေ့ ရခိုင့်ခေါင်းဆောင်အဆက်ဆက် မကိုင်တွယ်မပြုပြင်ခကတ်လို့ မတော်လှန်ခကတ်လို့ ငါရို့အဂုပိုင်အဖြိုက်ဆိုး အနနဆိုးတိကို ရင်ဆိုင်လာကတ်ရစွာဖြစ်တေ။
အဂုထိ ဗမာနေချဲ့ရို့ရေ ရခိုင်အမျိုးသားထေးကို ဂိုဏ်းဂနစွဲစိတ်၊ သေစွဲစိတ်ရို့ကို ရခိုင်သစ္စာဖောက်တိက တဆင့်ဖြိုက်ဖြိုက်၊ တိုက်ရိုက်ဖြိုက်ဖြိုက် သတ်သွင်းနိတုန်းဖြိုက်တေ။
ယင်းနန့် အဂုငါရို့အတွက်ကြပ်ကြပ်သတိထားစရာ သင်္ခန်းစာယူစရာလေးဖြိုက်တေ။
No comments:
Post a Comment